趣香佳譯｜文青食唔食雪芳蛋糕？

近年IG蛋糕店開到成行成市，其中有一款蛋糕深受大眾歡迎，就係戚風蛋糕嘞。個名聽落好似好高級咁，但其實只不過係海綿蛋糕加多咗植物油。而早喺IG蛋糕店盛行之前，好多香港人早就食過「戚風蛋糕」，即係大家耳熟能詳嘅嘉頓雪芳蛋糕。

可能因為嘉頓嘅蛋糕實在太乾，又唔係特別軟，所以好難聯想到原來兩種蛋糕都係嚟自同一個英文字「chiffon」。咁「chiffon」又係啲咩呢？就係雪紡。雖然叫「紡」，但佢係一種紗嚟，形容蛋糕嘅質地好輕軟柔滑。翻譯成「雪芳」，某程度上都有少少食字嘅成分。除咗話佢好似白雪一樣軟綿綿之外，仲加咗「芳香」嘅意思，而且讀起嚟都比較符合古法語流傳落嚟嘅讀音/ʃɪˈfɒn/。至於「戚風蛋糕」，應該係用最直覺嘅英文讀法/tʃɪˈfɒn/音譯而成嘅。個「風」字大概都係想講入面好多空氣，好綿軟嗰種感覺。不過相比起 「雪芳」，意思就冇咁直接。

咁究竟點解咁多香港蛋糕店都會賣「戚風」蛋糕，而唔係「雪芳」蛋糕呢？好可能係同某啲舖頭嘅餐牌上用「拿鐵」、「可頌」一樣，都係為咗聽落「台灣」啲、文青啲、高級啲（當然好有可能係因為佢哋睇台灣嘅食譜，或者都係人講佢又講）。至於點解會有呢種高級啲嘅效果？可能係因為人睇到唔熟悉嘅字詞組合（aka 同母語習慣唔一樣嘅翻譯）嘅時候，都會覺得比較有距離感，而距離產生美，所以感覺就會高級咗。

事實上，雖然好多蛋糕食譜都會寫明「戚風」即係「雪芳」，但幾年前《明報》有個餅店嘅訪問，餅店嘅合夥人就話原來兩者係有少少分別嘅。簡單嚟講，戚風蛋糕係雪芳蛋糕嘅進化版，雪芳蛋糕用全蛋法製作，即係蛋白同蛋黃一齊發打，而戚風蛋糕就運用分蛋法，先打蛋白，令蛋糕體口感更鬆軟。可見「戚風」同「雪芳」一開始可能係語言、翻譯上嘅分別，演變到而家，連概念上都唔同咗。所以究竟係語言影響世界，定係世界影響語言，都係一個有趣嘅問題。

大家仲諗唔諗到有咩類似嘅翻譯呢？歡迎喺留言開心share吓！

參考資料：

2018年8月14日，明報《知多啲：戚風比雪芳更鬆軟》，https://ol.mingpao.com/ldy/cultureleisure/dining/20180814/1534184354116/知多啲-戚風比雪芳更鬆軟

==========

人二譯社｜InBetween Translators’ Collaborative 🏠👯‍♀️

Translation | Transcription｜Proofreading | Reviewing | Copyediting｜Copywriting | Typesetting

Enquiries ✉️: [email protected]

Follow us on Instagram ✨: @inbetween.trans